Patronalak ez du gutxieneko soldata duinik nahi Hego Euskal Herriko langileontzat. Azken urteetan ahalegin ugari egin ditugu euskal gehiengo sindikaletik hori lortzeko, baina patronalak ez dira negoziazio mahaian eseri.
Gobernuek ere ez dute nahi gutxieneko soldata propioa izan dezagun. Nafarroako Parlamentuko Mahaiak ez du tramitera ere onartu gutxieneko soldata hemen finkatzeko Herri Ekimen Legegilea. EAEn EAJk eta PSEk bizkarra eman diote 140.000 pertsonek babestutako Herri Ekimen Legegileari, lehenago 150.000 sinadurekin gutxieneko pentsioa osatzeko aurkeztutakoarekin egin bezala. Gobernuen erantzuna guztiz antidemokrati-koa da, eta, horrela, gobernuen eta patronalen arteko aliantza sendoa agerian geratu da.
Bizitza garestitu da, baina soldatak ez dira neurri berean igo. Ondorioz, langileok erosahalmena galdu dugu. Inork ez du nahi, lana gogor egin ostean, miseriazko soldata bat jaso eta bizi proiektua garatzeko estu ibili. Guk ez dugu nahi Euskal Herrian inork bizitza duinerako nahikoa diru sarrera ez izatea. Horregatik da garrantzitsua, besteak beste, gutxieneko soldata hemen erabakitzea, 1.500€-ko gutxieneko soldata ezartzea.
Euskal Herriko errealitatera egokitutako gutxieneko soldata behar dugu. Gaur egun Madrildik ezartzen denak geroz eta pertsona gehiago pobretzen gaitu; bereziki, emakumeak*, gazteak eta migratutako pertsonak. Bitartean, denok ezagutzen ditugun gutxi horiek irabazi errekorrak dituzte. Ez da bidezkoa, eta, horregatik, greba orokorrera goaz:
- Confebask eta CEN presionatzeko, negoziatzera eseri eta 1.500 euroko gutxieneko soldata ezartzeko.
- Gutxieneko soldata hemen erabakitzeko behar diren ekimen politikoak gauzatu daitezen, Gasteizko eta Iruñeko parlamentuetan zein Madrilen. Eta euskal alderdiek neurri horiek babestu ditzaten.
- Soldatak hobetzeko eta aberastasunaren banaketa justuago baterantz aurrera egiteko.
Lortu dezakegu. Erakutsi dezagun elkarrekin dugun indarra!
Martxoaren 17an egin bat greba orokorrarekin!
Albisteak
2026-02-11 12:37
Parlamentuan aurkeztutako lege proposamenak Nafarroak bere SMI propioa izateko aukera hurbiltzen du
EH Bilduk eta Geroa Baik joan den astean lege proposamena erregistratu zuten Nafarroak bere Lanbide arteko Gutxieneko Soldata (LGS) ezartzeko eskumena izan dezan azken helburuarekin. ELA, LAB, Steilas, Hiru eta Etxalde sindikatuek uste dute martxoaren 17rako deitutako Greba Orokorra dela Parlamentuak lege hori onar dezan lortzeko tresnarik egokiena.
2026-02-10 12:33
Sindikatuak alderdi guztiekin bilduko dira LGSari buruz mintzatzeko, baina Yolanda Diazek ez ditu hartuko
PSOEk, Sumarrek, Podemosek, Junts per Catalunyak, ERCk, EAJk, EH-Bilduk, Compromísek eta BNGk sindikatuei harrera egingo diete otsailaren 12an Madrilen; aitzitik, Lan ministroak agenda arazoen aitzakia jarri eta ez du ordezko hitzordurik eman. Yolanda Diazek muzin egiten dio CCOO eta UGTz gainerako sindikalismo alternatiboari, ez du onartzen Estatuko plurinazionalitate sindikala eta indarrean eusten die lan prekarioa hedatzen duten arauei, oraingoan lanaldi partzialaren eta aldizkako finkoen bidez
2026-01-20 09:06
ELAk eta LABek auzitegietan eskatu dute Confebaskek negoziatzea, legeak agintzen duen bezala
Euskal Autonomia Erkidegoko Auzitegi Nagusiak aztertu egin behar izan du bi sindikatuek patronalaren aurka aurkeztutako demanda; izan ere, patronalak uko egin zion Lanbide arteko Gutxieneko Soldata negoziatzeko epaiketaren aurreko kontziliazio saioan parte hartzeari, Legeak negoziatzera behartzen badu ere. Confebasken itxieraren aurrean eta Eusko Legebiltzarrak Herri Ekimen Legegileari betoa jarri ostean, M17ko greba orokorra inoiz baino beharrezkoagoa dela uste dute sindikatuek.
